الصفحات

ياريتنى ماكنت بعرف اطبخ

احدث اجدد واروع واجمل واشيك ياريتنى ماكنت بعرف اطبخ

طبعا عنوان غريب جدا خصوصا على زوجة مصرية عربية اول مقوم من مقوماتها انها لازم تكون طباخة ماهرة وإلا تكون معرضة ان زوجها يتزوج عليها فى اى لحظة.

من اكبر العوائق الى بواجهها لما اعمل رجيم انى بعرف اطبخ كويس , واكلى بيكون حلو جدا فى معظم الأحيان, ده ما يمنعش طبعا ان الأكل يشيط مرة ولا يطلع وحش مرتين لكن القاعدة العامة انى طباخة ماهرة.

اى اكل اعمله مهما يكون بسيط او اى كلام يطلع طعمه جنان ولا يقاوم من أول الكشرى والباذنجان والبطاطس, مرورا بالخضروات والأرز واللحم , وصولا الى المحاشى والبشاميل والمقلوبة والبريانى , وطبعا ما اقدرش اقول لكم على الفتة بالخل والثوم.

اخر مرة عملت قرنبيط مقلى من كام يوم كان جميل لدرجة انك ما تقدرش تبطل اكل وتقوم غير لما يخلص, قعدت اقول لنفسى انا ايه الى خلانى اطبخ القرنبيط ده وانا عارفة انى بحبه, وما تقولوش انا بشكر فى نفسى او انه مش معقول حلو للدرجة دى وانى باكل وخلاص لأن اختى الرشيقة يومها قعدت تاكل لحد ما قالت بطنى وجعتنى وهو مجرد قرنبيط مقلى لا هو محمر ولا مشمر ولا طواجن ولا محاشى.

كل يوم اطبخ حاجة واقول انا هاكل النهاردة وابدء الرجيم من بكرة , ويجى بكرة اطبخ حاجة تانية تكون احلى من الى قبلها , وهلما جرا, لا الطبيخ الحلو بينتهى ولا الرجيم بيبتدى.

مع انى مش بطبخ غير الأكل العادى جدا فى معظم الأيام , يعنى رز وخضار ولحمة او فراخ , وبطبخ من غير تسبيكة عشان الرجيم والصحة العامة, بس من حلاوة الأكل ما بقدرش التزم بالكمية المحددة.

ومن اكبر العيوب الى فيا - هنعتبرها عيوب طبعا لأنها بتؤدى الى زيادة وزنى - انى بعرف كل حاجة تتاكل مع ايه عشان تكون احلى, او بمعنى اصح لى طقوس فى الأكل بتخلى من المستحيل انى فى يوم آكل قليل عشان طبخت نوع معين من الأكل, يعنى مثلا اللحمة المحمرة بموت فيها بالرز الأبيض بدون اى اضافات ماعدا البصل الناشف او الأخضر واحيانا السلطة, واللحمة السمينة شوية او اجزاء الفراخ الطرية دى بتكون احلى بالعيش الطرى, والرز والخضار الله عليه مع الشطة الخضرة او البصل , وكل نوع من انواع اللحم له طريقة تخليه احلى , مثلا الموزة بتكون جميلة وهى مسلوقة بس والله لو جنبها فتة بالخل والثوم, اما اللحمة السن فحلاوتها لما تكون مطبوخة مع الخضار , اى خضار, واللحمة الحمرة اعملها مع بصلة بس واسويها على الناشف بدون اضافة ماء ولو جنبها مكرونة يبقى اخر تمام , الفراخ البيضة يا اما على الناشف او فى صينية بطاطس وتاكلى اصابعك وراها, حتى الفول بعمله بكذا طريقة , يا اما بسيط خالص مجرد ليمون وزيت ورشة ملح وفلفل وكمون, يا اما اسويه مع طماطم وفلفل اخضر , يا اما احمر ثوم واشوح فيه طماطم واضيف الفول, وفى كل الأحوال بيكون طعمه روعة , ولا البيض ولا الباذنجان ولا البطاطس ولا الكشرى العادى ده الى هو رز وعدس اصفر بس , الله عليه لما احمر بصلة واقلبها عليه بعد ما يستوى.

اقولكم ايه ولا ايه ولا ايه بس , ولا رجيم ايه الى اعمله بعد كل الى قلته ده, مش قلت فى الأول ياريتنى ماكنت بعرف اطبخ.

انا عارفة ان ده كله مش عذر , بس انا بفضفض معاكم, امال انا فاتحة المدونة دى ليه

ادعو لى .

...

المشاركات الشائعة