المقادير:
• نص كيلو قراصيه (طازة وجديدة وطرية علشان ماتاخدش وقت وأنا باطلع البذر منها).
• لوز مسلوق ومقشر.
• 2/1 كوب سكر.
• لوز متقطع ومحمص.
• كريم شانتيه.
الطريقة:
• أول حاجة هاعمل الكريم شانتيه وكل اللي هنحتاجه 2 كوب كريم شانتيه جاهز من السوبر ماركت + 2 كوب لبن ساقع نضربهم مع بعض بالمضرب الكهربائي..
• بعد كده أجيب 2 كوب ماء مغلي أحط فيه اللوز لمدة دقيقتين ولما يبرد شوية أقشره بسهولة وبعدها أحشي القراصيه باللوز ده.
• هاجيب طاسة وهاحط فيها السكر واحطهم على النار لغاية لما السكر يسيح وأول ما السكر يدوب أوطي النار لحد ما أحس إن عندي صوص خفيف من السكر.
• بعد كده هاحط عليه القراصيه المحشيه وأقلبهم مع بعض.
• هاجيب طبق الحلو وهاحط فيه اللوز المحمص بطريقة عشوائية وبعد كده هاحط القراصيه المحشية واللي حطينا عليها السكر
• هاغطي كل القراصيه بالكريم شانتيه ومن على الوش هاحط اللوز المحمص.
ده الشكل النهائي للقراصيه باللوز والسكر والكريمةوبالهنا والشفا
