المقادير:
• كيلو صدور فراخ.
• 6 ثمرات فلفل ملون مقطع قطعا كبيرة.
• ربع كيلو ليمون مخلل ومخلي من البذر.
• ربع زيتون أخضر مخلل ومخلي من البذر.
• 2 عدد جزرة مقطعة شرائح.
• 2 عدد بصلة مقطعة مكعبات صغيرة.
• 2ملعقة دقيق.
• زيت زيتون.
• بودرة كاري.
• ملح / فلفل.
• كيس كسكسي "موجود في السوبر ماركت"
الطريقة:
• هجيب طاسة وهحط فيها شوية زيت زيتون وهشوح الجزر والبصل والفلفل الملون كلهم مع بعض.
• هجيب طاسة تانية وهحط فيها زيت زيتون وهشوح الفراخ بالملح والفلفل والكاري مع التقليب المتسمر.
• هضيف ملعقتين دقيق على طاسة الخضروات وأقلبهم كويس... بعد ما الفراخ تتشوح كويس أضيفها إلي الخضار والدقيق وأحط عليهم ميه وأسيبهم علشان يستوا على النار ويعملوا صوص وأضيف عليهم شوية كاري وبعد كده أضيف إليهم الليمون والزيتون المخلل وأغطيهم وأسيبهم لمدة خمس دقائق.
• هجيب طبق بايركس وهحط فيه الكسكسي وهضيف إليه شوية ملح وفلفل وزيت زيتون وزيت عادي وأقلبهم مع بعض كويس.
• هسخن ميه وبعد كده هحطها على الكسكسي وأغطيه بورق فويل وهدخله الفرن لمدة ست دقائق.
• بعد مرور ست دقائق هطلع الكسكسي من الفرن وأقلبه وهجيب طبق التقديم وهحط فيه كمية من الكسكسي في نص الطبق، وهبدأ أرص الفراخ حوالين الكسكسي ونفس الشيء مع الخضار هرصه وهحط الصوص من على الوش.
ده الشكل النهائي لطبق الفراخ على الطريقة المغربية....وبالهنا والشفا
